Sábadu 11 de marzu de 2017
Con estos inviernos tan raros que mos vienen últimamente anda uno perdíu, non se sabe si coyer los fierros o los gatos o el palote y dir pal güertu. Una semana con temperatures casi veraniegues, sumau a la poca ñeve caía esti añu, non daba muches esperances pal fin de semana.
Ya iba dos veces, que saliendo de nuechi a coyer lleña pal fueu, sintía cantar los sapos, y aunque el refraneru popular ya de pocu val con esto del cambiu climáticu, mio güela siempre diz "cuando canten los sapos antes d'abril, allí la ñeve ha de cubrir". La meteo confirmaba lo qu'avisaben los sapos, y pal sábadu de tarde entraba borrasca y fríu, asina qu'había que aprovechar la mañana del sábadu.
Últimamente cuadrar colos coyacios pa salir al monte ye mas difícil que la alineación de los astros, a última hora tuercense siempre los planes, asina que tocaba salir solu. Que por otru llau ye algo que me presta y necesito de vez en cuando.
Tenía gana volver al Vilosu a echar un güeyu, esa cara de la Peña la Rapaona siempre me llamó la atención y pienso que tien un potencial de la ostia pa la escalada en xelu y terrenu mixtu.
En avientu (diciembre), nuna primera incursión, habíamos subíu un corredor sencillu en la parte central de la paré y habia echau un güeyu a un estrechu canalón que subía pe la so derecha.
N'aquella ocasión entramos per Brañagayones, aprovechando que contaba col 4x4. Esta vez entré per Lleón, pol Valle de Ríu Pinzón.
 |
| Valle del ríu Pinzón y picu San Justo |
